طبقا لمنظمة الصحة العالمية , كبار السن والناس اللى بتعانى من أمراض مزمنة ( زى السكر والضغط وأمراض القلب وغيرهم .. ) بيكونو معرضين للإصابة بفيروس كورونا بنسبة أكبر من غيرهم ودا بسبب حالة الضعف العام اللى بيعانو منها وكمان ضعف المناعة

البعد عن التجمعات : التجمعات خطر كبير وتعتبر العدو الاول اللى بيهدد الوقاية من فيروس كورونا COVID 19 , لأن وجود عدد كبير من الناس معناه احتمالية السلام بالايدى او لمس حاجات مصابة بالمرض وبالتالي انتشار اكبر للفيروس عشان كده بننصح بضرورة بعد كبار السن عن التجمعات وإلغاء حضور اى مناسبات اجتماعية فى الوقت ده 

 تناول الادوية بشكل منتظم : ننصح بالاهتمام بتوقيت تناول الأدوية لكبار السن لحمايتهم من أي أمراض تانية ممكن يعانو منها فى الوقت ده وكمان بننصح بالتواصل مع الطبيب بشكل منتظم عن طريق التليفون فى الحالات اللى مش بتستدعى زيارة ضرورية .

اتباع نظام غذائى لرفع كفاءة المناعة : الجهاز المناعى بيلعب دور اساسى ومهم فى مقاومة الفيروسات والأمراض اللى بتصيب الجسم وعشان كده تقوية جهاز المناعة هى عامل مهم جدا للوقاية من فيروس كورونا وده بيتم عن طريق مجموعة من العناصر الغذائية المهمة للجسم ( زى الزنك والحديد ومضادات الاكسدة ) وكمان بيحتاج الجسم لمجموعة من الفيتامينات زى فيتامين سى وغيرهم واللى بيكونو موجودين فى اكلات كتير مثل

• المكسرات 
• الشاى الاخضر ( غنى بمضادات للاكسدة اللى بتقوى جهاز المناعة ) 
• البصل والثوم 
• اليوسفى والبرتقال والجوافة 
• السلطة الخضراء بالليمون 
• العسل الأبيض
• زيت الزيتون        

   تقليل التوتر والخوف : مهم جدا اننا نبعد كبار السن عن الاخبار اللى ممكن تسببلهم توتر او خوف زى زيادة عدد الاصابات او الوفيات, ولازم نرعى حالتهم النفسية واللى ممكن تأثر بالسلب على صحتهم عموما .

   النوم لمدة كافية : الاهتمام بالنوم لفترات كافية بيساعد على تقوية جهاز المناعة وتحسين أداء الخلايا المناعية  فى محاربة العدوى عشان كده بننصح بالنوم لمدة من 7 الى 9 ساعات يوميا عشان الجسم يحصل على كمية كافية من الراحة وكمان بننصح ببعض العادات اللى مهم نلتزم بيها فى اخر اليوم عشان تساعد على النوم الهادى وهي 

  الاستحمام بالماء الدافئ
• ممارسة الرياضة
• عدم استخدام الموبايل قبل النوم علي الاقل بساعة
• تناول وجبات خفيفة والابتعاد عن الوجبات الدسمة